shivAnandalaharI - Ramana's Selection

[Ravisankar S. Mayavaram]

Some time back I posted the verse numbers. Here are the verses in
the order selected.

aN^kolaM nijabiijasantatirayaskaantopalaM suuchikaa
saadhvii naijavibhuM lataa kshitiruhaM sindhuH saridvallabham.h |
praapnotiiha yathaa tathaa pashupateH paadaaravindadvayaM
chetovR^ittirupetya tishhThati sadaa saa bhaktirityuchyate || 61||

bhaktirmaheshapadapushhkaramaavasantii
kaadambiniiva kurute paritoshhavarshham.h |
saMpuurito bhavati yasya manasttaTaaka\-
stajjanmasasyamakhilaM saphalaM cha naa.anyat.h || 76||

jananamR^itiyutaanaaM sevayaa devataanaaM
na bhavati sukhaleshaH saMshayo naasti tatra |
ajanimamR^itaruupaM saambamiishaM bhajante
ya iha paramasaukhyaM te hi dhanyaa labhante || 83||

ghaTo vaa mR^itpiNDo.apyaNurapi cha dhuumo.agnirachalaH
paTo vaa tanturvaa pariharati kiM ghorashamanam.h |
vR^ithaa kaNThakshobhaM vahasi tarasaa tarkavachasaa
padaambhojaM shaMbhorbhaja paramasaukhyaM vraja sudhiiH || 6||

vakshastaaDanashaN^kayaa vichalito vaivasvato nirjaraaH
koTiirojjvalaratnadiipakalikaaniiraajanaM kurvate |
dR^ishhTvaa muktivadhuustanoti nibhR^itaashleshhaM bhavaaniipate
yachchetastava paadapadmabhajanaM tasyeha kiM durlabham.h || 65||

naratvaM devatvaM nagavanamR^igatvaM mashakataa
pashutvaM kiiTatvaM bhavatu vihagatvaadi jananam.h |
sadaa tvatpaadaabjasmaraNaparamaanandalaharii\-
vihaaraasaktaM ched.hdhR^idayamiha kiM tena vapushhaa || 10||

guhaayaaM gehe vaa bahirapi vane vaa.adrishikhare
jale vaa vahnau vaa vasatu vasateH kiM vada phalam.h |
sadaa yasyaivaantaHkaraNamapi shaMbho tava pade
sthitaM chedyogo.asau sa cha paramayogii sa cha sukhii || 12||

gabhiire kaasaare vishati vijane ghoravipine
vishaale shaile cha bhramati kusumaarthaM jaDamatiH |
samarpyaikaM chetaH sarasijamumaanaatha bhavate
sukhenaavasthaatuM jana iha na jaanaati kimaho || 9||

vaTurvaa gehii vaa yatirapi jaTii vaa taditaro
naro vaa yaH kashchidbhavatu bhava kiM tena bhavati |
yadiiyaM hR^itpadmaM yadi bhavadadhiinaM pashupate
tadiiyastvaM shaMbho bhavasi bhavabhaaraM cha vahasi || 11||

aadyaa.avidyaa hR^idgataa nirgataasii\-
dvidyaa hR^idyaa hR^idgataa tvatprasaadaat.h |
seve nityaM shriikaraM tvatpadaabjaM
bhaave mukterbhaajanaM raajamaule || 91||


--
Ravi

--
bhava shankara deshikame sharaNam

Archives : http://lists.advaita-vedanta.org/archives/advaita-l.html
Help     : Email to listmaster at lists.advaita-vedanta.org
Options  : To leave the list send a mail to
           listserv at lists.advaita-vedanta.org with
           SIGNOFF ADVAITA-L in the body.